كلمة الشعب
اد ايه بحلم أشوف الكلمة جاية
من عروق الشعب من درب سعادة
من مواويل النخيل جنب القناية
من بُكا النيل فى السواقي
لابسة أحلاها طواقي
لابسة عفريتة صنايعي معجباني
سايقة محرات كهربائى
اد ايه بحلم أشوف الكلمة جاية
جايبة من أسوان دهبها الاسمراني
وتعبها الاسمراني
جايبة من الفيوم عنبها السكراني
من دموع فرح بلدنا ف بورسعيد
جايبة الأغاني
أه يا كلمة شعبنا فى صدر الجرايد لعلعي
اطلعى من ضلعنا واتفرعي
معجبانية وشقيانة وعفية
لا انتى حرباية ولا بوشين ولا بنت زواني
واحنا ماشيين ناحية الشمس اللى بتقرب علينا
اصبحى سكة بشجرها الاخضراني
اد ايه بحلم أشوف باب الجرايد ينفتح
والسنابل داخلة شايلة فلاحينها
والمصانع ايدها فى ايدين شغالينها
افتحوا الباب
للصنايعية الفولاذ والفلاحين
افتحوا الباب واسمعوا
شعبنا دلوقت ح يقول كلمته
كلمة بإيدين .... شعبنا ما أجـدعه ...!!
واحدة من أجمل ما كتب "سيد حجاب" من قصائد لسان حالها كلمة ... الشعب
قالها الشعب فى ثورته بالفعل
